Ҡамауҙа ҡалғандарға кем ярҙам иткән?

Көслө ҡар-буран ҡойоно республиканы ялмап алды, юлдарҙа көрт, һырынтылар барлыҡҡа килде. Ошо хәлгә бәйле трассаларҙа транспорт хәрәкәте сикләнде.

Белорет районының таулы юлдары бындай һауа торошонда икеләтә хәүефлегә әйләнә. Саҡ ҡына ҡар һалһа, ауыр йөк тейәгән автомобилдәр туҡтарға мәжбүр, сөнки артабан хәрәкәт итә алмайҙар.

Һуңғы буран мәлендә лә ҙур йөк автомобилдәре туҡтап ҡалды. Ошо көтөлмәгән хәлдә “Беҙҙең хәстәр” ирекмәндәр үҙәге ағзалары Межгорье ҡалаһынан алып Инйәр ауылына тиклем арауыҡта алыҫ юлға сыҡҡан водителдәргә 23 йылы аш таратып сыҡҡан, кискә тиклем тағы ла 14 йыйылманы мохтаждарға тапшырасаҡтар.

Ирекмәндәрҙең был изге эшен халыҡ та маҡтап, хуплап яҙа.

Фото: социаль селтәрҙән.