"Атайсал" проектына ҡушыл!

Башҡортостанда “Атайсал” проекты эшләй башланы. Уға ярашлы, республикала ҡала һәм ауылдарҙан сыҡҡан уңышлы кешеләрҙең яҡташтарына, бәләкәй Ватанына ярҙам итеү системаһы булдырыласаҡ.

– Беҙҙә бәләкәй ауыл һәм ҡалаларҙан уңышлы кешеләр бик күп. Әгәр уларҙың һәр береһе өҫтәмә рәүештә тыуған еренә ярҙам күрһәтһә, был урындарҙа тормошто күпкә яҡшыртасаҡ, – тине Радий Хәбиров. – Күп эшҡыуарҙарҙың, бай кешеләрҙең былай ҙа ярҙам итеп торғанын беләм, тик беҙ был эште системалаштырырға теләйбеҙ. “Атайсал” проекты ошо маҡсатты күҙ уңында тота. Был бер нисек тә дәүләт хәл итә торған проблемаларҙы кешеләр иңенә һалырға тырышыу түгел. Был - күңел саҡырыуы буйынса тыуған ауылдарына, ҡалаларына, мәктәптәренә, балалар баҡсаһына, спорт секцияларына ярҙам итергә теләгән кешеләр өсөн уңайлыраҡ шарттар булдырырға тырышыу ғына.

Башҡортостан Башлығы Хакимиәте етәксеһе урынбаҫары Урал Килсенбаевтың белдереүенсә, Башҡортостан Республикаһы дәүләт идаралығының һанлы үҫеш министрлығы ярҙамында проекттың рәсми сайтын булдырған: https://ataisal.ru/ Һәр теләгән кеше унда инеп, кәрәкле ауылды табып, күрһәтергә теләгән ярҙамын йәки берәй проектты тормошҡа ашырыуҙы тәҡдим итә ала.

Проектҡа беренсе булып Дәүләт Йыйылышы – Ҡоролтай депутаты Фәрит Ғиндуллин ҡушылды һәм ул башҡарған эштәр тураһында һөйләне.

Көҙ “Атайсал” проектының “төҙөлөш” өлөшөн тормошҡа ашырыу йомғаҡтары барышында “Яҡташлыҡ көсө” тип аталған ҙур форум үткәрергә тәҡдим ителде. Унда ҡатнашыу өсөн әүҙем меценаттар саҡырыласаҡ. Радий Хәбиров был форумды уңыш йыйып алғандан һуң, октябрь аҙағында, үткәрергә кәрәк, тине.