Иҫәндә газ селтәре төҙөлә

Иҫән ауылында 12,8 километр оҙонлоғондағы түбән баҫымлы газ торбаһы һалына башланды. Ошо хаҡта Баймаҡ районы хакимиәте башлығы Фәнис Әминев социаль селтәрҙәге үҙенең сәхифәһендә белдерҙе. Төҙөлөш Республика адреслы инвестиция программаһы буйынса алып барыла, был маҡсатҡа БР бюджетынан 17,5 миллион һум самаһы аҡса бүленде. Бөгөнгә 3 километр газ торбаһын һалыу эштәре башҡарылған. Төҙөлөш эштәрен тамамлау 2021 йылдың декабрендә планлаштырыла.