Һаҡмар
-3 °С
Болотло
Антитеррор
Бөтә яңылыҡтар
Проза
4 Ғинуар 2019, 14:39

Рәзилә Ырыҫҡужина "КӘЛӘШ КӨТКӘНДӘ"

Эшлекле ҡиәфәттәге Зәйнетдин йүгереп өйгә инде лә, телевизорҙы ҡабыҙа һалып, ғәҙәтенсә ҡулына һыра алды ла, диванға ауҙы…(Тулыраҡ сайттан уҡығыҙ)

Ғәҙәттәгесә, тап Яңы йыл байрамы алдынан Зәйнетдин ауыл малайҙарын ҡорға йыйҙы:

– Тә-ә-әк, заманаларҙың ниндәйерәк икәнен күреп тораһығыҙ, егеттәр. Һеҙгә әле һиҙелмәгән кеүек булһа ла, ир ҡорона етә башлаһағыҙ, елкәгеҙгә килтереп бәрәсәк, мин әйтте тиерһегеҙ. Шуға, һәр йылдағыса, үҙегеҙҙе күрһәтеп ҡалыу мөмкинселеген быйыл да бирәм. Ышаныс ҙур, иң бәхетле егеткә бына-бына кәләш тыуырға тора. Еңгәгеҙҙе бөгөн иртән оҙаттым, әле ҡыуаныслы хәбәр көтәм. Яңы йылға бүләк, йәғни. Хәбәр килгәнсе, егеттәр, эште башлай торайыҡ.

Тә-ә-әк, һеҙгә һигеҙ-туғыҙ йәштәр самаһы, эйеме? Ызначит, Вәкил, Вәрис дуҫыңды етәклә лә, аҙна буйы сығарылмаған тиреҫте яйлап, әҙләп кенә һарайҙан баҡсаға һөйрәйһегеҙ. Еңгәгеҙҙе һүгәһегеҙ инде, ул һуңғы аҙна был эшкә тотона алманы.

Фәрит менән Ринат, һеҙ бынау өйөлөп ятҡан утынды урынлаштырығыҙ. Ҡайҙа икәнлеген мин белмәйем, үҙегеҙ ҡараштырығыҙ шунда. Мунсаға тигән яғыулыҡ ошолар булһа кәрәк. Ҡабаланмағыҙ, ауыр өйөм күтәреп, билегеҙҙе ауырттырып ҡуймағыҙ. Иң мөһиме – тәртип булһын, йәме. Әтеү, ауырлы ҡатын беләме ней ул, ярғаны ыңғайы урындарына һалып бармай, тау яһаған да ҡуйған. Артынан эш ҡалдырмаһа, минең бисәнең исеме юғала ул, аптырамағыҙ.

Азамат… Һәнәк тотоп килеп дөрөҫ эшләгәнһең, брат. Тимәк, һиңә лә кәләш кәрәк. Алдан уҡ әйтеп ҡуям, минең ҡыҙыҡай һиңә кәләш була алмай. Туғандарһығыҙ. Ну, килеүен-килгәс, мин һинең күңелеңде ҡалдырып, кире бороп ҡайтара алмайым. Бесәнлектең ҡайҙа икәнен беләһеңме? Белмәйһең? Еңгәңдең малдарға бесәнде ҡайҙан сығарып һалғанын да күргәнең юҡмы ни? Ыста, күршеләр улай булмай инде ул. Ә мин причем? Бар, ҡайтып атайыңдан белешеп кил дә, аҙнаға етәрлек бесән тарт. Түлкә алдаштан булмаһын, кире кил. Минең ҡыҙҙың иң яратҡан ағаһы булыу вакансияһы үҙеңә генә лә эләгеүе бар, эйе бит!

Марат, ә һин Моратты етәклә лә, малдарға һыу эсер. Эреһенә лә вағына ла. Ҡоҙоҡтан инде, ҡайҙан буһын! Үәт, кешеләр, әй. Ҡоҙоҡ ҡайҙа тиһеңме? Тәк-тәк-тәк… Еңелерәк берәй нәмә һорай алманыңмы? Мин ҡайҙан беләйем ти? Һыу ташыйым ыштоли? Ихатаны ныҡлап ҡараштырғылағыҙ, берәй урында булырға тейештер. Моғайын еңгәгеҙ йыл әйләнәһенә ҡорһаҡтарын күтәреп һыуҙы улаҡтан ташымайҙыр бит. Юл ыңғайына өйгә лә индерегеҙ. Иртән сәйнүккә ҡойорға һыу тапмай, Һөмәйрә ҡарсыҡҡа барып сәй эскәйнек малайҙар менән. Эй, сәйе тәмле ҡарсыҡтың! Балаларҙың бишәүһен дә шунда ҡалдырып ҡайттым. Әсәләре ҡыҙыҡай алып ҡайтҡансы, әйҙә, йәшәһендәр. Береһенән-береһе бәләкәй малайҙарҙы мин бер үҙем нисек ҡарарға тейешмен? Эйе лә инде! Улар әйләнгән һайын ашарға һорай. Ни футбол ҡаратмайҙар, ни кино… Һөмәйрә ҡарсыҡ ғүмере буйы яңғыҙы, танһыҡҡа шәп иттем мин уны. Яңы йылды ҡаршы алыуы ла күңеллерәк булыр, тигәндәй…

Эш барышы аңлашылды шикелле. Ярай, башлағыҙ. Ә мин өйҙә булам. Яңы йыл табынын әҙерләү ҙә, телефон ҡарауыллау ҙа минең өҫтә. Ҡыҙым тыуғанды мин ҡайҙан белергә тейеш тиһегеҙ? Әнә, былтыр шулай һеҙҙең менән юҡ-бар нәмәләр тураһында гәпләшеп тороп ней, тағы малай тыуҙы ла ҡуйҙы бит! Бишенсегә! Анһат тейһегеҙме әллә еңгәгеҙгә ярҙамсыларһыҙ бынау сама донъяны көтөүе? Юҡ инде, быйыл телефон төбөнән китеү юҡ. Һеҙ ҙә, кәләшле булғығыҙ килһә, әйҙә, тотоноғоҙ, ваҡытты һуҙмағыҙ!

Эшлекле ҡиәфәттәге Зәйнетдин йүгереп өйгә инде лә, телевизорҙы ҡабыҙа һалып, ғәҙәтенсә ҡулына һыра алды ла, диванға ауҙы…
Теги:яңы йыл
Читайте нас: