Был әкиәт иң яҡшыларының береһе

"Тамыр" телеканалының был әкиәте "ТЭФИ-Регион" 2020 Бөтә Рәсәй телевизион конкурсында финалға үтте.

- "Телевизион нәфис фильм/сериал" номинацияһында ТЭФИ академиктарының баһаһын алыуыбыҙ менән сикһеҙ бәхетлебеҙ.Жюри ағзаларына рәхмәтлемен. Ошондай ауыр ваҡытта ла балалар өсөн әкиәтте ҡарап баһаланылар. "Юғалсыҡтар иле"/"Мир потеряшек" әкиәтенең сценарийы көслө булды, тип уйлайым, - тип "Тамыр" балалар һәм үҫмерҙәр телеканалының директоры Гөлназ Ҡолһарина шатлығы менән уртаҡлашты. - Әкиәтте төшөрөү телевизион шарттарҙа бик үк еңел түгел. "Гарри Поттер" кеүек әкиәттәр ҡарап үҫкән йәш быуын өсөн әкиәт төшөрөү бик үк еңел түгел. Ҡайһы саҡ күңел ҡырылып ҡуя. Әммә беҙ тамашасылар менән бәйләнештә булғас, балаларға беҙҙең әкиәтебеҙ кәрәк икәнен аңлап торабыҙ. Йыл да бер әкиәт сығарып торабыҙ. «Юғалсыҡтар иле»нең редакторы - Гөлшат Ғәлиуллина.

Әкиәттең ижади төркөмө лә бик һәләтле - ҡуйыусы операторы Александр Лысенко, операторы Шамил Кәримов, монтаж режиссёры Дамир Сәлимов, тауыш режиссеры Азат Рәхимов, рәссамдары Альбина Шәһретдинова, Гөлназ Минһажева, режиссер ассистенты Зөлфиә Ибраһимова, администраторы Дилара Сөләймәнова. Төп ролдәрҙе башҡарыусы балалар: Искәндәр Мөхәмәтйәнов , Розалия Аҙнаева, Искәндәр Йәһүҙин.