Бөгөн мәғариф бүлегенең тамашалар залында 26 сығарылыш класс уҡыусыһы миҙал алды. Уҡыусыларҙы тәбрикләр өсөн район хакимиәтенең эштәр идарасыһы Илгиз Байымов, мәғариф бүлеге начальнигы вазифаһын башҡарыусы Фәнил Ирмәков, ата-әсәләр, уҡыусылар һәм уҡытыусылары килгән ине.
Мәғариф бүлеге начальнигы Фәнил Рамазан улы сығарылыш уҡыусыларын тәбрикләп:
-- Бына имтихандар ҙа тамамланды. Бөгөн беҙ 26 уҡыусыға уҡыуҙы уңышлы тамамлаған өсөн миҙалдар тапшырасаҡбыҙ. Был уҡыусылар алдында тиҙҙән бар ишектәр асыласаҡ. Балаларығыҙға дәрт һәм ҡанат өҫтәгән өсөн иң тәүҙә ата-әсәләргә рәхмәт һүҙҙәрен еткерер инем. Шулай уҡ уҡытыусыларына, остаздарына киләсәктә лә уңыштар юлдаш булһын, -- тине һәм миҙалсылар биргән мәктәптәрҙе һанап үтте.
Район хакимиәтенең эштәр идарасыһы Илгиз Хөрмәт улы ла сығарылыш уҡыусыларын ҡотланы һәм:
-- Үҙегеҙ теләгән уҡыу йортона инеп, теләгән һөнәрегеҙҙе үҙләштерергә яҙһын. Киләсәктә лайыҡлы шәхестәр һәм белгестәр булып районыбыҙға ҡайтығыҙ, -- тине.
Ата-әсәләр исеменән Гөлшат Иҫәнбаева сығыш яһап, уҡытыусыларға, мәғариф бүлегенә рәхмәт һүҙҙәрен еткерҙе.
Сығарылыш уҡыусылары ла, үҙ сиратында, ата-әсәләргә, уҡытыусыларына, яратҡан мәктәбенә рәхмәт һүҙҙәрен еткерҙе. Уҡыусылар исеменән ҡаланың 4-се лицейынан Регина Ҡоҙашева сығыш яһаны.
Тантаналы сара йыр-моң, дәртле бейеүҙәр менән һуғарылып барҙы.
Сара һуңынан иҫтәлеккә фото төштөләр.