Миҙалсылар тәбрикләнде

Уҙған шәмбелә районыбыҙҙың 11-се класты тик “бишле” билдәләренә генә тамамлаған, мәктәп, район тормошонда әүҙем ҡатнашҡан 39 уҡыусы мәғариф бүлегенең тамашалар залына йыйылды. Был ҡыҙҙар һәм егеттәргә ҡыҙыл төҫтәге аттестат менән миҙалдар тапшырылды.

Сара уҡыусы балаларҙың күңелле йыры менән башланып китте. Унан һүҙ мәғариф бүлеге начальнигы Илдус Әдиф улы Зәйнуллинға бирелде. “Быйыл миҙал алыусы уҡыусыларыбыҙ мәктәп, район кимәлендә генә түгел, республикала ла еңеүҙәр яуланы. Шулай уҡ Берҙәм дәүләт имтихандарында ла юғары күрһәткестәргә өлгәштеләр. Был балаларҙы әҙерләгән мәктәп етәкселегенә, уҡытыусыларға, ата-әсәләргә рәхмәтем ҙур. Уҡыусылар, һеҙгә тормошта үҙ урынығыҙҙы табырға яҙһын”, – тине ул.

Район хакимиәте башлығы урынбаҫары Гөлшат Камил ҡыҙы Сирғәлина быйыл миҙалсылар араһында Аҡморон, Өмөтбай, Икенсе Этҡол, Ниғәмәт, Ҡолсора, Иҫке Сибай, Төркмән, Йомаш, Ярат ауыл мәктәптәренән күпләп булыуына һөйөндө. Уҡытыусылар һәм ата-әсәләргә айырым рәхмәтен белдерҙе һәм уҡыусыларҙың лайыҡлы белем алып, яңы идеялар менән районға әйләнеп ҡайтыуҙарын теләне. Артабан уҡыусыларға “бишле” билдәләре менән аттестат һәм миҙалдар тапшырып үтте.

Уҡыусыларға артабан да тик уңыштар ғына йылмайһын. Тормош юлдарында тик яҡшы кешеләр осрап, үҙҙәре теләгән уҡыу йортона инеп, ҡыҙыл дипломлы белгестәр булырға яҙһын.