Зариф Байғусҡаров: “Бурыслыларҙың йәшәү минимумын һаҡлауға өлгәштек”

“Уны ҡабул иткәнсе бер нисә йыллыҡ ҙур юл үттек. Банк йәмәғәтсәлеге һәм микрофинанс ойошмалары яғынан ҡаршы тороусылар булды. Әммә беҙ уны эшләнек. Закон ҙур булмаған пенсия һәм эш хаҡы алған кешеләрҙе яҡлауға йүнәлтелгән. Әлбиттә, закон проекты ауыр барһа ла, Сергей Неверовтың, Андрей Исаевтың һәм Павел Крашенинниковтың ҙур ныҡышмалылыҡ күрһәтеүен билдәләп әйтер инем”, – ти депутат.

Хәҙер закон буйынса йәшәү минимумынан – 12702 һумдан кәм булған пенсияны һәм эш хаҡын тотоп ҡалыу тыйыла.

Йәғни бер ниндәй ҙә дәүләт органы ошо сумманан кәм аҡсаны тартып ала алмай, тип билдәләне Дәүләт Думаһының пленар ултырышында депутат Зариф Байғусҡаров.

“Әгәр кеше 14 мең һум пенсия алһа һәм суд ҡарары буйынса бурысы булһа, уның ярты пенсияһын тотоп алып ҡалалар ине. Уға ҡалған ете мең һумға ай буйы йәшәүе бик ҡыйынға төшә, сөнки коммуналь хеҙмәттәрҙе түләргә лә, ашарға ла кәрәк. Был ҡабул ителгән закон, кешенең һуңғы аҡсаһын ҡулға алыуҙы тыйып, мәсьәләне хәл итә”, – тип аңалатты депутат.

Зариф Байғусҡаровтың граждандарҙы яҡлау өсөн индергән төҙәтмәләренә ярашлы, әгәр ҙә субъекттың йәшәү минимумы Рәсәй Федерацияһы буйынса минимумдан күп булһа, ул саҡта төбәктәге минимум эш хаҡы йәки пенсия алына.

Бурыслының ҡарамағында балалар, инвалидтар булһа, улар ҙа иҫәпләгән саҡта “янмаған минимумда” иҫәпкә алынасаҡ. Ҡарамағында бер нисә кеше булған граждандар “тейелгеһеҙ” сумманы арттырыуҙы талап итеп, судҡа мөрәжәғәт итеү хоҡуғына эйә.

Әммә был сикләүҙәр алиментты, һаулыҡҡа килтерелгән зыянды, енәйәт һөҙөмтәһендә ҡараусыны юғалтыуға бәйле килтерелгән зыянды ҡайтарыуға ҡағылмай.

Фото: рәсми сығанаҡтарҙан.