"Аҡ үлем" һатыусылар тотолдо

ЮХХДИ инспекторҙары Иҫке Собханғол – Темәс трассаһының 20-се километрында “Лада Нива” автомобилен туҡтата. Уның менән Свердлов өлкәһенең 29 йәшлек бер ир-егете идара иткән була. Водитель һәм уның пассажиры - 36 йәшлек урындағы төбәк кешеһе үҙҙәрен бик шикле тота. Был, әлбиттә, ЮХХДИ инспекторҙарының үткер ҡарашынан иғтибарһыҙ ҡалмай. Уларҙың икеһе лә һорауҙарға аныҡ яуап бирә алмай ыҙалай, икеләнеү күрһәтәләр. Водителдең машина менән идара итеүгә хоҡуғы ла булмай сыға. Алкоголле эсемлек ҡулланыуы һиҙелмәй. Шулай булыуға ҡарамаҫтан, ул иҫерткес эсемлеккә һәм наркотик ҡулланыу-ҡулланмауҙы асыҡлау өсөн медицина күҙәтеүен үтеүгә ҡырҡа баш тарта.

Тикшереү барышында водителдең машина менән идара итеү таныҡлығынан мәхрүм ителгән булыуы ла асыҡлана. Автомобилде ҡараған ваҡытта шикле үҫемлек менән ике пакет табыла. Экспертиза һөҙөмтәһе буйынса уның ҡырағай киндер булыуы асыҡлана. Шулай итеп 800 грамм наркотик матдә тартып алынды. Улар кемдең ғүмерен ҡыйыр өсөн тәғәйенләнгән булған икән?

Урынға шунда уҡ тикшереү-оператив төркөм саҡырыла. Артабан тикшереү эштәре алып барыу өсөн водитель дә, пассажир ҙа полиция бүлегенә оҙатыла.