Онотмағыҙ, һеҙҙе өйҙә көтәләр!

Баймаҡ районы буйынса эске эштәр бүлегенең дежур хеҙмәтенән хәбәр итеүҙәренсә, уҙған аҙнала 195 хәл-ваҡиға теркәлгән, шуларҙың 10-һы криминаль характерға эйә. Кеше мөлкәтенә зыян килтереү (3), урлыҡ (2), үлтереү менән янау, мутлашыу, кеше өйөнә үтеп инеү, ялған документ эшләү кеүек осраҡтар теркәлгән.

ЮХХДИ инспекторҙары тарафынан юл хәрәкәте ҡағиҙәһен боҙған 148 осраҡ теркәлгән. Иҫерек килеш руль артына ултырған 11 водитель тотолған. Алкоголле эсемлек ҡулланған килеш машинаһы менән идара иткәне өсөн таныҡлығынан мәхрүм ителгән бер водителгә ҡарата, ҡабаттан эскән көйө руль артына ултырғаны өсөн енәйәт эше ҡуҙғатылған. Бер аҙнала 15 юл-транспорт ваҡиғаһы теркәлгән. Баймаҡ – Сибай трассаһында булған фажиғәлә тән йәрәхәттәре алыусылар булған, бер кешенең ғүмере өҙөлгән.