Баймаҡта үлемесле фажиғә теркәлгән

Баймаҡ ҡалаһында аяныслы ваҡиға теркәлгән.

Ҡиммәтле сит ил автомобиле водителе ҡаланың бер автосервисына машинаһын тикшертергә тип мөрәжәғәт итә. Әлбиттә, хеҙмәткәрҙәр клиентын һүҙһеҙ ҡабул итә. Тик бәлә аяҡ аҫтында шул: автомеханик ауыр машина аҫтында ҡалып һәләк була.

Тәфтишселәр асыҡлауынса, ул "Toyota Land Cruiser" автомобилен күтәргескә мендереп, тыныс ҡына двигателен ремонтлай башлай. Әммә ни сәбәптәндер, ҡапыл күтәргестең тросы өҙөлә. Ауыр автомобиль автомеханиктың өҫтөнә килеп төшә... Ир алған йәрәхәттәрҙән урында уҡ йән бирә. Был фажиғә тураһында "КП-Өфө" сығанағы хоҡуҡ һаҡлау органдары мәғлүмәттәренә таянып хәбәр итә.

Тәфтишселәр тикшереү үткәргәс, күтәргестең төҙөк булмауы асыҡлана. Әле был ваҡиға буйынса тикшереү эше башланған.

Фото: 100helps.ru

https://bash.rbsmi.ru/articles/y-m-i-t/Auir-mashinani-a-tinda-ala-213765/