Аңлаһаң...

Аңлаһаң

Яр башында оҙаҡ ултырһаң да,

Ағын һыуҙар уйға һалмаһа,

Һин эскәндә бокал төбөндә

Бер тамсы ла тороп ҡалмаһа, -

Йәш әле һин.

Һин йәш.

Аңлаһаң.

Мендәр мөйөштәрен сәйнәттереп,

Төндә үкенестәр ҡалмаһа,

Ғажиз булып хата яһауҙан,

Көн дә яңы тормош башлаһаң,-

Йәш әле һин.

Һин йәш.

Аңлаһаң.

Тыуаһы көн өсөн йөрәккенәң

Бигүк ҡабаланып ҡаҡмаһа,

Үткәндәрҙе хәтерләүҙән башҡа

Бер тамсы ла ҡайғың ҡалмаһа,

Тимәк, ҡартайғанһың,

Ҡартайғанһың, тимәк.

Аңлаһаң.

Буранбай Исҡужин.