ЯРАТАМ - ЯРАТМАЙЫМ!

Яратмайым егеттәрҙең

Төпсөнөп йөрөгәнен.

Иртә таңдан тороп алып

Төпсөгөн эҙләгәнен.

Яратмайым егеттәрҙең

Төндә ҡапҡа ҡаҡҡанын

“Үлтермәсе, зинһар”,-тип,

Башы шаңҡып торғанын.

Яратмайым әсәләрҙең

Балаһын эсергәнен.

Яратам мин уларҙың

Иманға төрөнгәнен.

Яратмайым бабайҙарҙың

Болғанлап атлағанын.

Алһыҙ-ялһыҙ әбейенән

Хәмерҙе таптырғанын.

Яратмайым йәштәрҙең

Меҫкенгә һалышҡанын.

Аҡса табыу ауыр тип

Диванда һаташҡанын.

Яратмайым ир-аттың,

“Минмен” тип йөрөгәнен.

Яратам мин уларҙың

Бахмурһыҙ йәшәгәнен.

Яратам мин ауылымдың

Арҙаҡлы ир-заттарын.

Илгә яуызлыҡ килгәндә

Айғыр менеп сапҡанын,

Ҡалҡан булып ҡалҡҡанын.

Яратам мин Алланы,

Ғәҙеллекте, донъяны.

Тәүфиҡлыны, баланы,

Иген үҫкән даланы.

Әхмәт Раҡаев.

Ишмөхәмәт ауылы.