Иртәнгелеккә бәлеш

Был ябай ғына бәлеште бешерер өсөн әллә ни аҙыҡ та кәрәк түгел. Тиҙ ҙә, тәмле лә. 

Шулай итеп,  1 стакан он, 1 стакан кефир, 2 йомортҡа, ярты балғалаҡ тоҙ, 1 балғалаҡ соданы әҙерләп ултыртайыҡ. 

Эслек тураһында ла онотмайыҡ. Бының өсөн 300 гр фарш, шаҡмаҡлап туралған 2-3 башлы һуған, тәменә ҡарап тоҙ, борос алына. 

Кефирға сода ҡушып болғатабыҙ ҙа 5 минуттай ултыртып торабыҙ. Унан ҡалған ингридиенттарҙы ҡушып яҡшылап болғатабыҙ. 

Майлап он һибелгән формаға ҡамырҙың яртыһын ҡоябыҙ ҙа бешмәгән фаршты йәйеп ҡуябыҙ. Уның өҫтөнә ҡалған ҡамырҙы ҡоябыҙ. 

Әҙер бәлеште 170 градус ҡыҙыулыҡтағы духовкала 40 минут тирәһе бешерәбеҙ. 

Ашығыҙ тәмле, өҫтәлегеҙ йәмле булһын!