Помидор сәстегеҙме әле, дуҫтар?

Помидор сәстегеҙме әле?

Помидор яҡшы һәм ныҡлы булып үҫһен өсөн, баҡсасыларға бер нисә кәңәш бирәбеҙ.

Помидорҙы аҙнаһына бер тапҡыр картуф ҡайнаған һыуҙы ҡойорға кәрәк. Ләкин уның өсөн картуфтың тоҙһоҙ һыуҙа бешерелгән булыуы мотлаҡ. Һыуын һыуытырға һәм 1 тамсы йод тамыҙып, яҡшылап болғатырға һәм үҫентенең төбөнә ҡойорға кәрәк.

Банан ҡабаҡтарын да ташларға ашыҡмағыҙ. Үҫентеләрҙе күсереп ултыртыр алдынан һауыттар төбөнә бер ҡат балсыҡ, уның өҫтөнә ваҡлап туралған банан ҡабығы, уның өҫтөнә тағы ла балсыҡ һалырға. Тупраҡ аҫтында банан ҡабыҡтары сереп, помидор өсөн туҡлыҡлы матдә бирәсәк.

Шулай уҡ һуған ҡабығы ла үҫентеләрҙе төрлө сирҙәрҙән, ҡоротҡос бөжәктәрҙән һаҡлаясаҡ. Уны яһау өсөн бер стакан һуған ҡабығын ике стакан һыуҙа ҡайнатып сығарырға, ике тәүлек төнәтергә һәм ҡулланыр алдынан ун стакан һыуға һалып болғатырға. Төнәтмәне аҙнаһына бер тапҡыр һибергә кәрәк.

Фото асыҡ сығанаҡтан алынды.