Ҡамырҙан шыршы өсөн уйынсыҡтар

Шыршыҡай-матурҡайҙы биҙәр өсөн магазиндан уйынсыҡтар һатып алыу мотлаҡ түгел. Уны үҙебеҙ өйҙә лә эшләй алабыҙ. Бының өсөн он, шул уҡ миҡдарҙа һыу, 1/2 тоҙ, 1/4 крахмал, 8-10 гр лимон кислотаһы, 2 аш ҡалағы үҫемлек майы кәрәк була. Табаға һыу, он, тоҙ, крахмал, лимон кислотаһын һәм үҫемлек майын ҡушып болғатабыҙ. Унан ҡамыр пластилин кеүек булғансы талғын утта болғай-болғай бешерәбеҙ.Әҙер ҡамырҙы пленка менән төрөп өҫтөнә таҫтамал ябып ҡуябыҙ. Ул ошолай һыуынырға тейеш. Хәҙер ҡамырҙы йәйеп үҙегеҙгә оҡшаған фигураларҙы эшләйбеҙ. Глазурь йә гуаш менән өҫтөн биҙәйбеҙ. Әҙер фигураларҙы духовкала бешереп алырға ла, өҫтәлдә килеш ҡатырырға ла мөмкин. Байрамдарығыҙ мөбәрәк һәм мөғжизәле булһын!