Таулыҡайҙар мәсеттә ҡорбан ашы үткәрҙе.

"Һуңғы йылдарҙа ауылдаштарҙың дингә яҡынайыуы, йома намаҙҙарына күпләп йөрөүҙәре, әрүәхтәр рухына, йорт-ил тыныслығына бағышлап аяттар уҡытыуы, ҡорбан аштары үткәреүе - ҡыуаныслы. Бөгөн дә матур сараға йыйылғанбыҙ", - тине үҙ сығышында Таулыҡай ауылының имам-хатибы Мазһар Салихов. Һәм мәжлес сәбәпсеһе булған Илшат Булат улының һаулығына, ғаиләһенең именлегенә, эштәренең һәр саҡ уң булыуына юрап, доға бағышланы. Ишалиндар үткәргән ҡорбан ашы тураһында тулыраҡ сайтта:

Таулыҡай ауылында йәшәүсе Хәнифә һәм Булат Ишалиндарҙы ауылдаштары матур, өлгөлө, эшһөйәр һәм дәртле ғаилә булараҡ белә һәм хөрмәт итә. Улар күпләп йылҡы, һыйыр малдары көтә, ҡош - ҡорт аҫрай. Бынан тыш, уңған хужа һәм хужабикә баҡса үҫтереүгә лә күп көс һала. Баҡсаларында һәр төрлө емеш - еләк, йәшелсә ишелеп уңа. Ә йәйен ихата алдын йәмләп ултырған аллы - гөллө сәскәләрҙең төрҙәре буйынса иҫәбе - һаны булмай!
Дәртләнеп, тырышып, үҙ ҡулдары менән матурлыҡ тыуҙырып донъя көтә Ишалиндар ғаиләһе. Уларҙың йыл һайын Яңы йыл байрамында йорттары янын матур итеп биҙәүе ауылдаштарға байрам кәйефе бүләк итә. Кистәрен төрлө төҫтә балҡып янған гирляндалар, һындар һәм тауҙар әкиәт илен хәтерләтә.
Ә кисәге көн ихлас күңелле, ҡунаҡсыл Хәнифә апай менән Булат ағай ауыл мәсетендә улдары Илшатҡа бағышлап ҡорбан ашы мәжлесе үткәрҙе.
Ҡот, нур уйнап торған иман йортона билдәле ваҡытҡа Ишалиндарҙың туғандары, яҡындары, ауылдаштары йыйылды.
Һүҙ тәүҙә ауылдың имам-хатибы Мазһар Салиховҡа бирелде. "Һуңғы йылдарҙа ауылдаштарҙың дингә яҡынайыуы, йома намаҙҙарына күпләп йөрөүҙәре, әрүәхтәр рухына, йорт-ил тыныслығына бағышлап аяттар уҡытыуы, ҡорбан аштары үткәреүе - ҡыуаныслы. Бөгөн дә матур сараға йыйылғанбыҙ", - тине ул үҙ сығышында. Һәм мәжлес сәбәпсеһе булған Илшат Булат улының һаулығына, ғаиләһенең именлегенә, эштәренең һәр саҡ уң булыуына юрап, доға бағышланы. Матур йолаға ярашлы, изге теләктәр теләнде, хәйерҙәр таратылды.
Ишалиндар ғаиләһе мәсеткә буш ҡул менән килмәгән. Илшат менән Гүзәл намаҙлыҡ һәм аҡса бирһә, Хәнифә апай менән Булат ағай чайник һәм биҙрәләр бүләк итте.
Ҡунаҡтар хужабикләр әҙерләгән ҡорбан итенән, тәмле бишбармаҡтан ауыҙ итте. Тултырма, эс - ҡарын, хатта баш ите лә булды мул табын артында. "Ҡорбанлыҡ малдың баш итен ташламайбыҙ. Һәр ваҡыт эш итеп, табынға бирәбеҙ. Сөнки иң ҙур сауабы - баш итендә, тигән ырым да йәшәй халҡыбыҙҙа",- тине Хәнифә апай.
Ҡорбан ашында ҡунаҡтар рәхәтләнеп аралашты, шулай уҡ вәғәздәр тыңланы, йорт - ил тыныслығы өсөн доғалар ҡылды.
Һый - ниғмәттәр менән тулы табын артына йыйылыусылар әлеге мәжлесте ойоштороусыларға ҙур рәхмәт һүҙҙәрен еткерҙе һәм иман йортонан рухланып, күңелдәрен байытып таралышты.
Беҙ ҙә туғандарын, ауылдаштарын изге йортҡа йыйып, матур табын үткәргән Ишалиндар ғаиләһенә "афарин" тибеҙ. Салған ҡорбандарығыҙ ҡабул булһын, барлыҡ изге уй-хыялдарығыҙ тормошҡа ашһын, Алла бирһә!

#АйыҡАуыл2024
#ТрезвоеСело2024
#ҡоролтай
#курултай
#БаймаҡРайоны
#БаймакскийРайон
#ВсемирныйКурултайБашкир
#ФСГО
#ФондГрантов