Арҙаҡлы шәхес, танылған педагог һәм яҙыусы

Совет дәүерендә, бигерәк тә көҙгө баҫыу эштәре тамамланып, ҡышҡа аяҡ баҫҡас та, күрше колхоз-совхоздар менән аралашып концерт-спектаклдәр ҡуйыу матур йолаға әүерелгәйне. Беҙгә йәнәш кенә йәшәгән Икенсе Этҡол, Темәс ауылдарының художество үҙешмәкәр түңәрәк ағзалары йыш ҡына сығыш яһай ине. Ул саҡта ауыл Советындағы берҙән-бер клуб Муллаҡайҙа элекке мәсет бинаһында урынлашҡайны.1957 йылдың ҡышҡы айы ине. Беҙ ул саҡта Муллаҡай ете йыллыҡ мәктәбенең һуңғы класында уҡый инек. Бөгөн клубта Икенсе Этҡол, Байым ауылдары һәүәҫкәрҙәре шәп концерт күрһәтәсәк, тигәстәр, беҙ, бер төркөм ятаҡ малайҙары (мәктәп янында ҡырҙан килеп уҡыусылар өсөн ятаҡ булды), эркелешеп концертҡа килдек. Мине урта кәүҙәле, ҡуйы ҡара сәстәрен артҡа ыҡсым ғына итеп тараған, янып торған күҙле егеттең Мостай Кәримдең “Үлмәҫбай” поэмаһын күңелдәргә үтеп инерлек итеп, аһәңле һөйләүе тетрәндерҙе. Ул заманға ярты быуаттан ашыу ваҡыт үтеп тә киткән. Ә ана шул һын һаман да минең күҙ алдымда тора. Ул буласаҡ педагог, йәмәғәт эшмәкәре, журналист һәм яҙыусы Азамат Әғзәм улы Тажетдинов ине. Алтмышынсы йылдарҙың башында матбуғатта уның мәғариф, тыуған төйәге һәм кешеләре тураһында район гәзитендә бер-бер артлы һүрәтләмәләре баҫыла башланы. Мин дә, йәш ҡәләм тибрәтеүсе булараҡ, Азамат Әғзәм улы менән хәбәрселәрҙең район йыйылыштарында йыш ҡына осраша, һөйләшә инем. Әлбиттә, ул йылдарҙа гәзиткә яҙышҡан кеше бер-береһен яҡындан белде, күптәре яҡын дуҫҡа һәм иптәшкә әйләнде. Артабан инде А.Тажетдинов менән район китапханаһы янында ойошторолған “Атайсал” ҡоро йыйылыштарында йыш ҡына осрашырға тура килде. Минең “Данлы, ырыҫлы төйәгем” исемле китабымдың исем туйында уның ҡатнашыуы һәм сығыш яһауы киләсәктә тағы ла яңы әҫәрҙәр өҫтөндә эшләргә этәргес көс бирҙе. Ә унан алда Азамат Әғзәм улының “Беҙ – байымдар”, “Ел-дауылдар аша” китаптарын ҡулдарыбыҙға алып ҡыуанғайныҡ.