ҒАИЛӘ БЫЛ...

ҒАИЛӘ БЫЛ...

Ҡатын һәм ир талаша,
Өйҙә хайран - тамаша.
Икеһе лә ҡыҙғандар,
Әҙәп сиген уҙғандар.

Ниндәй генә һүҙ сыҡмай,
Ярай әле, күҙ сыҡмай.
Талаш бер мәл һүрелә,
Ир кейемгә үрелә.

- Мин китәм, - тей, - хуш, ҡатын,
Тик белеп ҡал: яраттым.
Күрешмәһәк яңынан,
Телгә алма яманлап.

Ҡатын әйтә: - Хуш, ирем,
Мин дә бик һөйә инем,
Һин эштә сағыңда ла
Һағынып бөтә инем.

- Ысынмы, ҡатын?
- Ысын, ҡартым.
- Яраттыңмы?
- Яраттым.
- Әле ләме?
- Әле лә!
- Мин дә һөйҙөм мәңгегә.

Һүҙ китә гөлдөр-гөлдөр,
Күҙ итә мөлдөр-мөлдөр.
Бүрек баштан ташлана,
... Тормош ҡабат башлана.

Фәнис Яруллин.

Фото асыҡ сығанаҡтан алынды:h9BB1-DwfMw