Юғалтабыҙ!..

Юғалтабыҙ

Юғалтабыҙ атай-әсәйҙәрҙе,
Яҡын туған, дуҫты, ҡорҙашты .
Мәңгелеккә күсеп улар йәне
Һауаларға менеп олғашты .
Китәләр шул... Йөрәк әрнеттереп,
Уңалмаҫлыҡ яра ҡалдырып.
Киткәндәргә кире ҡайтыуҙар юҡ
Күпме көтмә күҙең талдырып.
Изге йәндәр йыһандарға ашып
Сағыу йондоҙ булып ҡабыныр.
Ерҙәгеләр доғаларын уҡып
Шул яҡтыға бағып табыныр.
Эй хоҙайым! Аңһыҙ ҡазаларҙан,
Ҡайғы-хәсрәттәрҙән арала.
Юғалтыуға бер аҙ күнер инек
Үҙ мәлдәре етеп алһа ла.
Үкенесһеҙ китеү булмай тиҙәр,
Ҡалғандарға бирсе сабырлыҡ !?
Күңелдәргә шифа, көсөндә бир,
Һағыштарҙы еңә алырлыҡ !?

(автор Сәлимә Барлыбаева-Иҫәндәүләтова)

Фото асыҡ сығанаҡтан алынды.