Бабичтарҙың нәҫел төбәгендә шағирҙың тыуыуына 125 йыл тулыу билдәләнде

Бөгөн Мишкә районы Ҡыйғаҙытамаҡ ауылында Шәйехзада Бабичтың тыуыуына 125 йыллығына арналған саралар үтә. Был ауылда шағир һәм дәүләт эшмәкәренең атаһы тыуған һәм ерләнгән. Бабич нәҫеленең вариҫтары әле лә ауыл халҡының ҙур нисбәтен тәшкил итә. Байрамға ауыл халҡы, Бабичевтар ғаиләһе вәкилдәре, Башҡортостандың мәҙәниәт министры урынбаҫары Рәнис Рәжәп улы Алтынбаев, Республиканың Дәүләт йыйылышы-Ҡоролтай рәйесе урынбаҫары, Бөтә донъя башҡорттары ҡоролтайы президиумы рәйесе Эльвира Ринат ҡыҙы Айытҡолова, республика Яҙыусылар союзы рәйесе Зәки Арыҫлан улы Әлибаев ҡатнашты.

Байрам саралары шәлкеме ауыл хеҙмәтсәндәренә һәйкәл асыу тантанаһынан башланды. Ялан батырҙарының фиҙакәрлеге символы итеп Т-74 тракторы һайланды. Ауыл эшселәренең тоғро ярҙамсыһы булған был тимер машина Ҡыйғаҙытамаҡҡа ингән юл ҡырында, тау башында урынлашҡан һәм ауылдың һәр нөктәһенән дә күренә.

Артабанғы тантана ауыл үҙәгендәге яңы музей бинаһы ҡаршыһында үтте. Ауыл советы һәм Ҡыйғаҙытамаҡ халҡы көсө менән тупланған Шәйехзада Бабич музейы ишектәрен асты. Мәрхәмәтле ҡунаҡтар өсөн экскурсия ойошторолдо, уның бер өлөшөн шағирҙың ағаһы Мөхәммәткәрим Бабичтың тыуасары Алина үткәрҙе.

«Бер йыл ярым элек Мишкә районы хакимиәтенән музейҙы ошо бинаға күсерергә рөхсәт һораныҡ, улар ҡаршы килмәне. Иң ҙур ярҙамды, әлбиттә, ауыл халҡы күрһәтте. Йәштәр төҙөлөш менән ярҙам итһә, өлкәндәр экспонаттар туплауҙа өлөш индерҙе. Бабичевтар нәҫеле бында ун туғыҙынсы быуат уртаһында төпләнгән. Беҙҙә, мәҫәлән, Шәйехзаданың бер туған һеңлеһе Фәсәхәт Бабичева төҙөгән шәжәрә һаҡлана. Ул боронғо ҡулъяҙма оҙаҡ йылдар дауамында яҙылған, ғәрәп графикаһында башланып, аҙаҡ кириллицаға күсә. Уға һәм яҡташ ғалимыбыҙ, шул уҡ нәҫел вәкиле Кирәй Мәргән туплаған материалдарға нигеҙләнеп, беҙ был ғаиләнең тулы шәжәрәһен төҙөп, тулыландырып киләбеҙ»,— Әлфиә Зарипова, Ҡыйғаҙытамаҡ ауылында Ш.Бабич музейы мөдире.

Байрам сәхнәһендә дауам иткән байрам барышында Мишкә районының әүҙем йәмәғәт эшмәкәрҙәренә Бөтә донъя башҡорттары ҡоролтайының рәхмәт хаттары тапшырылды. «Мираҫ» йыр һәм бейеү ансамбле етәксеһе, Башҡортостандың атҡаҙанған сәнғәт эшмәкәре Нәфирә Назметдин ҡыҙы Иҡсанова-Бабичеваға Мишкә районының почетлы гражданы исеме тапшырылды. Бабичтар нәҫеленең вәкилдәре араһында был төбәккә тәү тапҡыр килеүселәр ҙә булды.

«Беҙ Дауыт улым менән Ҡыйғаҙытамаҡҡа тәүгә килдек. Мине иң һоҡландырған күренеш — халыҡтың бер шәхес тирәләй тупланғаны. Был ауылдың рухи терәге — Шәйехзада Бабич. Фәсәхәт апайыбыҙҙың шағир тураһында һөйләүҙәре иҫемдә. Ул саҡта, 70-се йылдарҙа, шағирҙың исеме әллә ни билдәле түгел ине, шуға минең хәтерҙә ул серле, һоҡландырғыс яҙмышлы шәхес булып ҡалды. Бөгөн килеп беҙ уның да, үҙебеҙҙең дә аҫаба ерҙе күреп, был тәрән тарихтың бәләкәй бер өлөшө булдыҡ»,— Рушана Бабич, Башҡортостандың халыҡ артисы.

Артабан сәхнәгә «Аҡбуҙат» балалар журналы ойошторған «Бабич һүҙе» шиғри конкурсының еңеүселәре күтәрелде. Өфөнән ун йәшлек Искәндәр Әминев, Йылайырҙан алты йәшлек Нәркәс Бикбулатова, Хәйбулланан алты йәшлек Ләйсән Мәмбәтова, Дүртөйлөнән ете йәшлек Артем Ғиләжев был видеоконкурста ҡатнашып, еңеүселәр тип табылды һәм бүләкләнде. Балаларҙың Шәйехзада Бабичтың рухлы шиғырҙарын уҡыуы ауыл халҡының дәррәү алҡыштарына күмелде.

Сараның эшлекле һөҙөмтәһе итеп Мишкә, Дүртөйлө һәм Йылайыр райондары араһында килешеүгә ҡул ҡуйылды. Шағирҙың нәҫел төбәге, тыуған ере һәм һуңғы төйәге булған өс район Шәйехзада Бабичтың исемен мәңгеләштереүгә арналған сараларҙа хеҙмәттәшлек итергә килеште.

https://kurultai.ru/ba/content/1235-v-rodovom-sele-babichevyh-otmetili-125-letie-so-dnya-rozhdeniya-poeta-shajhzady-babicha/

Читайте нас:

Редакция һайлауы

Антитеррор

17 Ноябрь 2021, 12:16

Ышаныс телефондары!

Антитеррор

27 Август 2019, 23:34

Телефоны экстренной помощи

Антитеррор

28 Август 2019, 00:46

Телефон доверия для детей, подростков, родителей