Эй, Хоҙайым...

"Эй Хоҙайым, кеше көнлө итмә, Дусар итмә йотом һыуҙарға..." Гөлиә Мөкминева - Азаматованың йөрәк түренән сыҡҡан, иҫ киткес шиғырының дауамын беҙҙең сайтта уҡый алаһығыҙ.

Эй Хоҙайым, кеше көнлө итмә,

Дусар итмә йотом һыуҙарға.

Яндарыңда яҡын кешең булһын,

Мохтаж саҡта ҡулын һуҙарға.

Зар-интизар итмә берүк Хоҙай,

Яҡты йөҙгә, йылы һүҙҙәргә.

Сабырлыҡ бир, әгәр һынау бирһәң,

Һынмайынса ғына түҙергә.

Эш бәхете бир һин, хәләл ризыҡ-

Үҙең эшләп тапҡан аш бит ул.

Кеше ҡулдарынан алған ризыҡ,

Тамағыңа торған таш бит ул.

Ҡара һалҡын , йәнде ялмап ала,

Көткән кешең әгәр килмәһә.

Күрмәмеш тә булып, юлдарыңда,

Иҫәнлек тә һиңә бирмәһә.

Кеше көнлө итмә, кеше хәлен,

Аңлар аҡылымды юғалтма.

Ҡәҙерһеҙләп, яман һүҙҙәр менән,

Туған араларын болғатма.

Эй Хоҙайым, хәтер ҡалдырырлыҡ,

Шарттарыңды берүк булдырма.

Изге итеп һаҡла күңелемде,

Бәғеремде генә туңдырма.

Көс бир миңә, үҙем ярҙам итәм,

Йылы һүҙем менән йылытам.

Ауыр саҡта яндарымда булған,

Дуҫ-туғандарымды онотмам.

(Гөлиә Мөкминова-Азаматова)

Читайте нас:

Редакция һайлауы

Новости партнеров