Барлыҡ матур сифаттарға эйә.

    Барлыҡ матур сифаттарға эйә.

Төбәктең алдынғы ҡарашлы, әүҙем ҡатын-ҡыҙҙарының береһе,  ҡоролтайҙың башҡарма комитеты  ағзаһы, район ҡатын-ҡыҙҙар советы рәйесе Гөлшат Рим ҡыҙы Байдәүләтова бөгөн ғүмер байрамын - матур юбилейын ҡаршылай.

Г.Байдәүләтова 1964 йылдың 30 ноябрендә Аҡморон ауылында тыуған. Бала саҡтан белемгә ынтылған маҡсатлы ҡыҙ 1982-1985 йылдарҙа Сибай педагогия училищеһында хеҙмәт, черчение уҡытыусыһы һәм тәрбиәсе һөнәре буйынса белем ала. Уны уңышлы тамамлағас, балалар баҡсаһында тәрбиәсе, мөдир булып эшләй. Аҙаҡтан БДУ-ның «Педагогика һәм психология» бүлеген тамамлай. Белемле, маҡсатлы    хеҙмәткәр оҙаҡ йылдар етәксе урындарҙа эшләй. 2003-2020 йылдарҙа ҡаланың 4-се мәктәбендә директорҙың тәрбиәүи эштәр буйынса урынбаҫары , унан һуң «Ғаилә» үҙәге етәксеһе була.

2022 йылдан алып әлеге көнгә тиклем Урал аръяғы агросәнәғәт колледжында уҡытыу-тәрбиә буйынса директор урынбаҫары вазифаһын башҡара.

Ул - талапсан етәксе.  Студенттарға белем биреүҙән тыш, уларҙы  патриотик рухта үҫтереүгә лә ҙур иғтибар бүлә. Шуға ла колледжда төрлө патриотик саралар, осрашыуҙар йыш үтә.

Гөлшат Байдәүләтова - Баймаҡ районы башҡорттары ҡоролтайы башҡарма комитеты ағзаһы ла. Районда «Айыҡ ауыл», «Сәләмәт ауыл», «Сылтыр шишмә», «Башҡорт телен һаҡлау һәм артабан үҫтереү» һәм башҡа проекттарҙың тормошҡа уңышлы ашырылыуында Гөлшат Рим ҡыҙының роле ҙур. Ул проектта ҡатнашыусы ауылдар халҡы менән осрашыуҙарҙа ҡатнаша, кәңәштәрен еткерә, фекерҙәре менән бүлешә. Мәктәптәргә, махсус хәрби операцияла ҡатнашҡан яугир ғаиләһенә «Йәншишмә» балалар һәм үҫмерҙәр гәзитенә лә яҙҙырҙы ул. «Гөлшат Рим ҡыҙы менән тәүҙә мәғариф өлкәһендә бергә тир түкһәк, хәҙер ҡоролтай башҡарма комитетында бергә эш алып барабыҙ. Ул иңенә йөкмәтелгән бурыстарға яуаплы ҡарай, башлаған эшен еренә еткереп, намыҫлы башҡара. Бөтә ыңғай сифаттарҙы үҙендә туплаған ул», - тине Баймаҡ районы башҡорттары ҡоролтайы башҡарма комитеты рәйесе Ришат Ишембәтов.

Эшлекле ханым район ҡатын-ҡыҙҙар советы рәйесе йөгөн дә уңышлы тарта. Уның етәкселегендәге йәмәғәт ойошмаһы бихисап эштәр башҡара. Ҡатын-ҡыҙҙар махсус хәрби операцияла ҡатнашыусы ир-егеттәргә йылы ойоҡбаштар бәйләй, маскировкалау селтәрҙәре үрә, төрлө кәрәк-яраҡтар туплай, күңел йылыһын ҡушып хаттар яҙа. Яуҙа мәрхүм булып ҡалған ир-егеттәрҙең әсәләренә, ғаиләләренә, яҡындарына ауыр ваҡытта рухи яҡтан ярҙам итә.

Баҫҡан ерендә ут сәсрәтеп торған, алдына ҙур маҡсаттар ҡуйып, уны тормошҡа ашырыу өсөн күп көс һалған, район үҫешенә тос өлөш индергән Гөлшат Рим ҡыҙына һоҡланмау мөмкин түгел. Уның намыҫлы хеҙмәте етәкселек тарафынан да юғары баһалана. “Рәсәй Федерацияһының почетлы дөйөм белем биреү өлкәһе хеҙмәткәре” исеме, БР Мәғариф министрлығының, БР Дәүләт Йыйылышы - Ҡоролтайҙың Почет грамоталары, бихисап Рәхмәт хаттары быға асыҡ дәлил.

Гөлшат Байдәүләтова эшендә ихтирам, хөрмәт яулаған коллега, йәмәғәт эштәрендә әүҙем йәмәғәтсе булһа, ғаиләһендә тормош иптәшенә һөйөклө ҡатын, балаларына хәстәрлекле әсә. Тормош иптәше Азамат Булат улы менән ике ҡыҙға һәм бер улға ғүмер бүләк иткәндәр. Балаларының һәр береһенә матур тәрбиә, белем биреп, оло тормош юлына аяҡ баҫтырғандар. Хәҙер ул ейән-ейәнсәрҙәре өсөн һөйөклө өләсәй. Уңған ханым баҡса тултырып йәшелсә-емеш, һәр төрлө сәскә үҫтерә. Уларҙың нур сәсеп торған ҡотло йорто әллә ҡайҙан балҡып ултыра.

Үткәндәренә байҡау яһаһаң, ысынлап та, Гөлшат Рим ҡыҙы бик матур, өлгөлө тормош юлы үткән. Абруйлы, нәзәкәтле, мөләйем, тырыш,ярҙамсыл, барлыҡ матур сифаттарҙы үҙендә туплаған оло йөрәкле шәхес ул Гөлшат Байдәүләтова. Уны матур юбилейы менән ҡотлап, иң изге теләктәрҙе еткерәбеҙ. Сәләмәтлек, күңел көрлөгө, ғаилә именлеге, балалар ҡыуанысы бер ваҡытта ла һеҙҙе ташламаһын. Көләс йөҙөгөҙҙән йылмайыу китмәһен. Һәр атҡан таңға ҡыуанып, бәрәкәтле мул тормошта йәшәргә яҙһын Һеҙгә,хөрмәтле юбиляр!

Альбина Байегетова.