Һүҙ - "Аждаһалар"ға

2024 йыл – Аждаһа йылы. Уны иҫкә төшөргәс тә беҙгә бәләкәй саҡта өләсәйҙәрҙең һөйләгәнен ишетеп үҫкән, тылсымлы китаптарҙан таныш булған тирә-яғына утлы ялҡын сәскән өс башлы аждаһа күҙ алдына килеп баҫа. Киләһе йыл беҙҙе ниндәй Аждаһа көтә? Ғөмүмән, кем ул – Аждаһа? Башҡа йыл хужаларынан нимәһе менән айырыла? Ҡыш бабайҙың мөғжизәһенә ышанаһығыҙмы? Яңы йылды ниндәй традициялар менән ҡаршы алаһығыҙ? Ошо һорауҙар менән беҙ “аждаһалар”ға мөрәжәғәт иттек. Роза Сөләймәнова, Баймаҡ ҡалаһынан, 1940 йылда тыуған. Тулыраҡ беҙҙең сайтта:

Роза Сөләймәнова, Баймаҡ ҡалаһынан, 1940 йылда тыуған:

- Һәр килгән йыл үҙенсәлекле һәм Аллаһы Тәғәләнең рөхсәте менән генә башлана. Киләсәк Аждаһа йылы ла бик матур, бәрәкәтле йыл булыр, тип уйлайым. Азия илдәренән килгән йыл атамаларына иғтибар биреп тә бармайым. Әммә “аждаһалар тураһында әйткәндә, улар – көслө рухлы, аҡыллы, ҡыйыу, ғәҙел характерлы кешеләр йылы, тип уйлайым.

- Йәшебеҙгә ҡарамай, һәр Яңы йылды тулҡынланып көтәбеҙ, шыршы ултыртабыҙ. Бик тә булмаһа берәй гөлөмдө булһа ла биҙәп ҡуйырға тырышам.

- Әлбиттә, Ҡыш бабайҙың бүләктәренән мәхрүм ҡалмайбыҙ. Ғөмүмән, ҡыштың тәҙрәләргә семәрләп һүрәт төшөрөүе, ер өҫтөндә йым-йым ҡарҙар ятыуын үҙе бер мөғжизә тип ҡабул итәм.

- Һәр Яңы йылды балалар менән бергә ҡаршы алабыҙ, бүләктәр бирешәбеҙ. Ә үҙем йыл да байрам табынына гөбәҙиә бәлешен бешереп, балаларымды һыйлайым.