Тыныс, ныҡыш, ҡаратырыш - 2

Яугилдина Ғилминур Дәүләтғәле ҡыҙы, Әбделкәрим ауылында йәшәй, 1949 йылда тыуған:

- “Һыйыр” булараҡ, тыныс холоҡломон, кеше менән талаша һалып бармайым, бәхәскә лә инмәйем, ҡысҡырып та һөйләшмәйем, көлмәйем дә. Киләһе йылдан оло кеше нимә теләй? Әлбиттә, һаулыҡ, бәхетле ҡартлыҡ, балаларҙың имен-һау булыуҙары, ҡыуанып йәшәүҙәре инде. Донъялар тыныс торһон. – Кешенең ниндәй йылда тыуғанына ҡарап, характеры ла шуға тап киләлер, тип уйлайым. Бер улым Тауыҡ йылында тыуған ине, мәрхүм булып ҡалды инде. Әтәс һымаҡ ул да осоп-ҡунып йәшәне. – Йондоҙнамәгә ышанам. Ҡарап, танышып барам. Тап килгән ерҙәре бар. Ғөмүмән, халыҡ юрауҙары, һынамыштары менән ул оҡшаш бит. Мәҫәлән, ай кәртәләнһә – буранға. Ҡояш ҡолаҡланһа, йә ямғыр, йә ҡар яуа.