Мин ризамын һинән, Сусҡа йылым!

Күҙ теймәһен,үкенерлек түгел,

Биг(е)рәк түлле булды Сусҡа йылым.

Болоттарым быйыл таралды ла,

Ай яҡтыртты алға барыр юлым.

Рәхмәт инде,күк көмбәҙең йәме

ай-ҡояшың нурын мулдан һиптең

Соҡор-саҡырҙарҙа баҙап ҡалмай

еңел генә йылым атлап үттем.

Йорт-ҡурама бәрәкәттәр бирҙең

Һаулығымды минән ҡыҙғанманың

Балаларым,йөрәк тамырҙарын,

ҡурсалауҙан һис тә йыбанманың.

Ашым һалһам тәрилкәләр парлы

Сәйем ҡойһам сынаяғым икәү

Һанаманым телгән икмәгемде

Өйөм белмәй нимә икән бикләү.

Туғандарым иҫән-теүәллеген

теләүемде,рәхмәт,ҡабул иттең.

Ҡыуаныстар,күңел тыныслығын

баш өҫтөмә йондоҙ итеп һиптең.

Зиһенемдең өймәләмә тулған

яңыһынан ҡуйҙың туҫтағын да

Йөрәгемде асып һөйләшерҙәй

һайлап-һайлап бирҙең дуҫтарын да.

Ике күҙем гел яҡтылыҡ күрә

Ҡолаҡтарым тыңлай яҡшы хәбәр

Йөрәгем дә өмөт менән тибә —

булһын киләсәгем зәңгәр-зәңгәр.

Рәхмәт,Сусҡам,мин ризамын һинән.

Һин дә ризалығың бирсе миңә.

Инде, Сысҡанҡайҙы күрә һалып,

кәңәштәрең бирә күрсе генә!!!

/Гөлирә Латипова— Хисмәтуллина/