-5 °С
Ҡар

Бөтә яңылыҡтар

Айрат Сирбаев исемендәге конкурс

26 Март 2020, 18:01

Был һуң ниндәй замана?

#Һаҡмар_конкурс_АйратСирбаев Ҡәҙерле дуҫтар! Ишдәүләт Мөхтәр улы Сәфиуллин үҙе ижад иткән шиғырҙарын да, хикәйәләрен дә конкурсҡа тәҡдим итеп өлгөрҙө. Бөгөн ул конкурсҡа "Бер тигәндә", "Эскелеккә – яу!", "Был һуң ниндәй замана?" исемле ҡобайырҙарын тәҡдим итте.

Бер тигәндә

Бер тигәндә нимәң бар?

Берҙәм булыр илем бар.

Ике тигәндә нимәң бар?

Ике һөйләмәҫ телем бар.

Өс тигәндә нимәң бар?

Күстәй көслө халҡым бар.

Дүрт тигәндә нимәң бар?

Йөрәгемдә ялҡын бар.

Бер тигәндә ни булыр?

Беҙҙәй осло күҙ булыр.

Ике тигәндә ни булыр?

Икеләнмәҫ һүҙ булыр.

Өс тигәндә ни булыр?

Өлгө алыр ир булыр.

Дүрт тигәндә ни булыр?

Дүрт тарафлы ер булыр.

Бер тигәндә нимәң юҡ?

Бер балҡымаҫ даным юҡ.

Ике тигәндә нимәң юҡ?

Икһеҙ-сикһеҙ малым юҡ.

Өс тигәндә нимәң юҡ?

Үс алырҙай кешем юҡ.

Дүрт тигәндә нимәң юҡ?

Дөрөҫ булмаҫ эшем юҡ.

Бер тигәндә ни булмаҫ?

Бер ҙә бөтмәҫ сир булмаҫ.

Ике тигәндә ни булмаҫ?

Ишетелмәҫ сер булмаҫ.

Өс тигәндә ни булмаҫ?

Өнһөҙ-тынһыҙ йыр булмаҫ.

Дүрт тигәндә ни булмаҫ?

Дөлдөлһөҙ батыр булмаҫ.

Бер тигәндә ни файҙа?

Белем алһаң, шул файҙа.

Ике тигәндә ни файҙа?

Ишле булһаң, шул файҙа.

Өс тигәндә ни файҙа?

Өлөш бирһәң, шул файҙа.

Дүрт тигәндә ни файҙа?

Донъя ҡорһаң, шул файҙа.

Бер тигәндә ни зыян?

Бешмәгән ризыҡ зыян.

Ике тигәндә ни зыян?

Ирмәкһеҙ ҡыҙыҡ зыян.

Өс тигәндә ни зыян?

Һөсләтелгән эт зыян.

Дүрт тигәндә ни зыян?

Дошманыңдай бет зыян.

Эскелеккә – яу!

Дау һаламын, йәмәғәт!

Саң ҡағамын, йәмәғәт!

Тыңла, зинһар, һүҙемде,

Аңла берүк үҙемде:

Ҡотолайыҡ афәттән,

Ҡасайыҡ һәләкәттән.

Һаҡланайыҡ ҡазанан,

Үлем тигән язанан.

Хәрәм ризыҡ ул хәмер,

Эсһәң, аҡылың кәмер.

Аңың юйып иҫерһәң,

Күҙең тоноп тилерһәң,

Ҙур енәйәт ҡылырһың,

Яһилдарҙан булырһың!

Булмаҫ һиндә тоғролоҡ,

Яһарһың ҙур уғрылыҡ.

Бар булғанды бөтөрөп:

Көсләп, талап, үлтереп

Бәлә килер башыңа!

Баҫһаң Хоҙай ҡаршына,

Ни тип яуап бирерһең?

Бит менән ер һөрөрһөң;

Дуңғыҙ кеүек соҡсоноп,

Тиҙәк еҫкәп йөрөрһөң!

Эскеселә йәм булмаҫ,

Уға бер ни йәл булмаҫ.

Ул да тыумаҫ, ҡыҙ ҙа тыумаҫ,

Тыуһа ла, оҙаҡ тормаҫ!

Иҫеректең иҫе теүәл

Тиһәләр ҙә – буш хәбәр.

Алъяғанға аҡыл кермәҫ,

Матурланмаҫ ул мәгәр.

Туҡтауһыҙ күп эсеүҙән

Сереп төшөр ти бауыр.

Мейе бөтөр, йөрәк бөтөр –

Уларһыҙ йәшәү ауыр.

Йөҙ-сырайың сирышып,

Тамырҙарың ҡорошоп,

Ҡаҡ һөйәккә ҡалырһың,

Ваҡытһыҙ ҡартайырһың!

Өмөт итмә киләсәккә

Һаман йотһаң һин хәмер.

Кешелегеңде юғалтһаң,

Ахыры булыр ҡәбер.