+23 °С
Ясна
Бөтә яңылыҡтар
Айрат Сирбаев исемендәге конкурс
18 Март 2020, 18:30
Еңеүҙе яҡынайтҡан тылдағы үҫмерҙәргә арнайым
#Һаҡмар_конкурс_АйратСирбаевҠәҙерле дуҫтар! Ҡаршы алығыҙ: сығышы менән Сыңғыҙ ауылынан булған, әле Хәйбулла районында йәшәгән Альбина Ҡәйепова-Мәхмүтова һеҙҙең иғтибарығыҙға үҙенең шиғырҙар шәлкемен тәҡдим итә.Ҡәҙерле дуҫтар! Һеҙ ҙә яҫтыҡ аҫтында йәшереп һаҡлаған шиғырҙарығыҙҙы беҙгә тәҡдим итегеҙ. Иң әүҙем, иң уҡымлы әҫәр махсус бүләккә эйә буласаҡ.
Еңеүҙе яҡынайтҡан тылдағы үҫмерҙәргә арнайым
Кисә генә уйнап-көлөп йөрөгән
Балаларға бөгөн ни булған?
“Һуғыш” тигән ҡәһәрле бер һүҙҙән
Күңел өшөп, күҙгә йәш тулған.
Һуғыш, һуғыш... тыуған илен һаҡлап,
Фронтҡа китте йәп-йәш ағайҙар.
Күҙ алдында ҡапыл олоғайҙы
Үҫмер ҡыҙҙар һәм дә малайҙар.
Ручкаларын алмаштырҙы улар:
Ҡулда көрәк, һәнәк, балталар.
Бирешмәҫтәр, һуғыш ҡына бөтһөн,
Иҫән генә ҡайтһын атайҙар.
Ҡара таңдан тороп һалҡын ҡышта
Үгеҙ менән китте урманға.
Ағас ҡырҡып, утын тейәп ҡайтты,
Ҡурҡмайынса ыжғыр буранда.
Өйҙә көтә уны ҡартәсәһе,
Ә әсәйе – алыҫ шахтала.
Өс һеңлеһе, ике ҡустыһы
Ҡаршы сыға йүгереп ҡапҡаға.
Атай урынына ҡалған үҫмер
Бесән сапты, түҙҙе барына.
Ер тырматты, яҙын иген сәсте,
Һыр бирмәне Еңеү хаҡына.
Һуғыш, һуғыш, күпме балаларҙы,
Һин атайһыҙ иттең, аямай.
Атҡарып та булмаҫ эштәрҙе лә
Йөкмәттең һин йәшкә ҡарамай.
Өмөтләнеп көттө Еңеү көнөн
Һәр береһе – тылда ҡалғандар.
Фронт өсөн, фәҡәт Еңеү өсөн
Улар бөтә көсөн һалғандар.
Бына ул көн: майҙың туғыҙы,
Ҡайғы менән шатлыҡ буталған,
Һуғыш бөткән, ләкин хыялдар
Селпәрәмә килгән, онталған.
Яуҙа үлгән ғәзиз атаһы,
Олатаһы күптән юғалған...
75 йыл үткән 45-тән,
Яу яраһы бер аҙ уңалған...
Һәр йыл һайын килә матур яҙҙар,
Яҙҙар менән килә һағыштар.
Күңел яралары онотолмай,
Тик булмаһын ғына һуғыштар.
Оноторға беҙҙең хаҡыбыҙ юҡ
Тыл һәм һуғыш ветерандарын.
Һөрөм ҡапламаһын тормошомдоң
Һеҙ яулаған матур ал таңын.
12 март, 2020 йыл
Альбина Ҡәйепова-Мәхмүтова
Насип булһын тием, осрашырға...
Ҙур йыйынға әҙерләнә ауылым,
Барлап бөтә нәҫел - тамырын.
Тормош йәмен, илһам шишмәләрен
Бары һиндә генә табырмын.
“Тыуған ауылым Һаҡмар буйҙарында”,-
Хөсәйенең һине данлаған.
Гимн булып һеңгән күңелдәргә,
Йырламаған кеше ҡалмаған.
Ярмайылғаң, Күсәбәләр аҡҡан,
Ауылымды бүлеп уртаға.
Нисә быуын һиндә тамыр йәйгән
Ҙур тормошҡа – оло донъяға.
Сәләм биреп тыуған ауылына
Нәбиуллаң йырҙа маҡтаған.
Йәшәү көсө, оло бәхетте
Һинән башҡа ерҙә тапмаған.
Бейеү алиһәһе Рәшиҙәләр,
Үтәғолдәр менән Туйсиндар,
Сыңғыҙымдың уңған кешеләре
Һәр саҡ алдынғылар булһындар!
Ғорурланам бөгөн һеҙҙең менән,
Ауылымдың ветерандары!
Яуҙа үлгән батыр егеттәрҙең
Тыуған ергә ҡайтты дандары.
Мәғрур Һәрешҡужам, Алсынбайым,
Олотауым, гүзәл Һаҡмарым,
Бала сағым уҙған ауылымды
Күңелемдә мәңге һаҡлармын.
Һағынамын изге тупрағыңды,
Атай нигеҙен, ғәмһеҙ саҡтарҙы,
Сит ерҙәрҙең алтын һарайына
Алмаштырмам тыуған яҡтарҙы.
Бәхетлемен һиндә тыуғаныма,
Һинең менән бәйле яҙмышым.
Тыуған ауылым, ауылдаштарым,
Һеҙҙең менән - бөтә булмышым.
Йорт-ил тыныс булһын,
Күңелгә нур тулһын,
Имен генә атһын таңдарым,
Насип булһын йәмле йәй көнөндә
Осрашырға, ауылдаштарым!
1.03.2020
Альбина Ҡәйепова-Мәхмүтова
Самауырға дан йыры
Башҡорттарҙа ғына була торған
Ҡунаҡсыллыҡ – хөрмәт билгеһе.
Бер кинәнес туғандарың менән
Самауырлап сәйҙәр эсеүе.
О, самауыр! Һинең шыжлауыңдан
Күңелдәргә тула йыуаныс.
Бергәләшеп дуҫ-иштәрең менән
Сәйҙәр эсеү – үҙе ҡыуаныс.
Самауырҙың сәйен эсмәгәндәр
Беләме ни уның тәмдәрен?!
Мәтрүшкәләп сәйҙәр эскәндә
Тоям матур тормош йәмдәрен.
Күңелгә йәм, йөрәккә дәрт бирә,
Тәндәремә сихәт бөркөлә.
Мәтрүшкәнең тәмле сәйҙәре
Бар кешегә файҙа килтерә.
Сәй эсеүме – өҫтәл табынында
Самауырың йырлап тормағас.
Байрам буламы ни бер осрашып
Бергәләшеп күңел асмағас.
Самауырым ҡайнап торһон,
Дуҫтарым килеп торһон.
Туғандарым иҫән булһын,
Донъялар имен торһон.
Эй, туғандар, иҫән саҡта
Тормошто беҙ һөйәйек.
Өҫтәл йәме – самауырҙың
Ҡәҙерҙәрен беләйек.
Ҡайнап торған самауырға ҡарап
Тәмләп-тәмләп сәйҙәр эсәбеҙ.
О, самауыр! Һине данлайбыҙ,
Ҡәҙерләйбеҙ һәм дә ҙурлайбыҙ!
23.09.2020
Альбина Ҡәйепова-Мәхмүтова
Читайте нас:
© 2024
Телефон
(34751)31326
Электрон почта
Адресы
453630, Республика Башкортостан, Баймакский район, г. Баймак, пр-т С. Юлаева, 38
Реклама хеҙмәте
(34751)31337
Редакция
(34751)21499
Ҡабул итеү бүлмәһе
(34751)31326
Хеҙмәттәшлек
(34751)21499
Кадрҙар бүлеге
(34751)21838