+17 °С
Ясна
Бөтә яңылыҡтар
Айрат Сирбаев исемендәге конкурс
5 Февраль 2020, 00:02
Уйланыуҙар
#Һаҡмар_конкурс_АйратСирбаевҠәҙерле дуҫтар! Гөлдәр Калимуллина хикәйәләр генә яҙып ҡалмай, шиғырҙар ҙа ижад итә. Әле ул конкурс шарттарына ярашлы өс шиғырын ебәргән. Ата-әсә хаталарын бала Ҡабатлаймы? Эйе, ҡабатлай. Фәһҽм алманыммы? Балам да бит Шул тырмаға баҫа аңғармай. (дауамын сайттан уҡығыҙ)
Уйланыуҙар
Ата-әсә хаталарын бала
ҡабатлаймы? Эйе, ҡабатлай.
Фәһем алманыммы? Балам да бит,
Шул тырмаға баҫа аңғармай.
Беҙҙең уңыштарҙан балаларым
Нурҙар алыр микән үҙенә.
Олоғайғас улар балаһының
Тура ҡарарҙармы күҙенә.
Беҙҙең эштә алған тәжрибәбеҙ
Күсерме һуң? Аҡыл? Таһыллыҡ?
Беҙҙең һүҙҙе хәтерләрме аҙаҡ?
Ғәҙәт ҡалыр...Әллә яһиллыҡ?
- Мин әҙәпле! - тиеп ҡысҡырһам да,
Балам үтә күрә... Һиҙенә...
- Әхлаҡ, иман... - тиеп ҡабатлайым,
Ышанамы минең һүҙемә.
Нимә мираҫ итеп ҡалдырырмын?
Аҡсам ҡалмаҫ... Күңел байлығы?
Олоғайғас мин уларға баҡһам,
Һиҙелмәҫме күңел тарлығы...
Һуңмы хәҙер беҙгә төҙәлергә?
Ғәмәл дәфтәрҙәрен кем үлсәй?
Беҙгә ҡарап һоҡланамы берәү?
Әллә арттан көлөп, гел үсәй...
Уңыштарым, хаталарым менән
Ҡабул итер мине бер хоҙай.
Был донъяла нисек йәшәнем мин?
Яуабым юҡ. Бары гел һорау.
Уҙғандарым эҙҙәре
Аҡ ҡағыҙға төшөп ,һүҙ ҡалдыра
Уҙған йылдарымдың эҙҙәре.
Һәр кем яҙа шулай, үҙ яҙмышын
Ә маңлайҙа алла яҙғаны.
Кеше хаталана, ҡолай, тора
Ҡабат-ҡабат баҫа тырмаға.
Анттар әйтә, нәҙер инселәйҙер,
Упҡын ярҙарында торғанға.
Тайҙым тигәс, алла көсөн бирә
Тырышынып үрләй үрҙәргә.
Уҙған йылдарына эҙен һалған
Сабатаһын элә түрҙәргә.
Торһон түрҙә, кеше көлөр инде
Минең өсөн улар ҡәҙерле.
Күҙем һурпаланып, уға ҡарап,
Мин иҫләйем үткән ғүмерҙе.
Берәҙәк әсә
"Балнис" тупһаһына һалған саҡта
Яңы ғына тапҡан балаһын.
Бәғерҙәре генә теленгәндер
Тапмағандыр бүтән сараһын.
Ни эшләһен, бүтән әмәле юҡ,
Йәшәр урын тапмай зарыға.
Биш минутлыҡ хата, үкенә ул,
Үҙ әсәһе хәҙер тарыға.
Уҡыр кәрәк, эш тә табып булмай,
Башын төртөр урын табалмай.
Биш минутлыҡ йәре, ҡасты инде
Уның хәлен хәҙер аңламай.
Ниңә улай? Хәҙер туй күлдәге
Хыялында ғына ҡалырмы?
Өмөт менән көткән ҡыҙ ғынаһы
Әсәй, тиеп әйтә алырмы?
Кемгә әйтер? Ниҙәр көтә уны?
Нисек булыр уның яҙмышы?
Бынан ары "йәшәү" йәшәү булмаҫ,
Төшөр инде уның ҡарғышы.
Ҡышҡы селлә. Тупһалағы бала,
Әсә һөтө һорап илайҙыр.
Яңы ғына ул әсәйле ине,
Әле бер ташландыҡ балалыр.
Кемдер әйтә, бер үләкһә кәнтәй
Бесәй балаларын имеҙә.
Үҙ балаңды ҡуйыныңа ҡыҫып,
Үҙең имеҙеүгә ни етә.
Йылы өйҙә, туйып ҡарҡ кикереп,
Кеше тикшереүе еңелдер.
Заман елдәренә ҡаршы тороп,
Йәшәүҙәре еңел түгелдер.
Йәштәр хәҙер йәшәй интернетта,
Өйләнешә, донъя көтәләр.
Телефонға бармаҡ һыйпап ҡына,
Ауырлыҡты күрмәй үҫәләр.
Әҙер түгел тормош һынауына,
Ысынбарлыҡ түгел интернет.
Тере бала йөрәк ярып илай,
Көтә алмаҫ уны интегеп.
Буталған был донъя, бала тыуғас та уҡ
Баш тарталар яңғыҙ әсәләр.
Ҡан дошманы бесәй балаларын
Имеҙәләр арыҡ кәнтәйҙәр.
Ҡайҙа бара тормош, кем ғәйепле?
Ғәйеп кемдә? Ҡыҙҙа? Егеттә?
Үҙе аңламағас ямау итеп,
Аҡыл биреп булмай, тегеп тә.
Гөлдәр Кәлимуллина.
Читайте нас:
© 2024
Телефон
(34751)31326
Электрон почта
Адресы
453630, Республика Башкортостан, Баймакский район, г. Баймак, пр-т С. Юлаева, 38
Реклама хеҙмәте
(34751)31337
Редакция
(34751)21499
Ҡабул итеү бүлмәһе
(34751)31326
Хеҙмәттәшлек
(34751)21499
Кадрҙар бүлеге
(34751)21838