Һөнәренә бар күңелен һала

Баймаҡ үҙәк район дауаханаһында үҙ эшен шул тиклем яратып башҡарған яратҡан медицина хеҙмәткәрҙәре бихисап. Шуларҙың береһе - физиотерапия кабинетында шәфҡәт туташы булып эшләүсе Лиә Фәйзуллина.  Ул - яҡтылыҡ һәм электр менән дауалау буйынса  фельдшер. Ике кабинет араһында халыҡты ҡабул итеп, атлап түгел, йүгереп йөрөгән, сиратта ултырыусыларға ла матур мөғәләмәлә булған медицина хеҙмәткәре миндә ихтирам тойғоһо уятты. Үҙ эшен яратҡаны күренеп тора, тигән уй үтте баштан.

Лиә Фәйзуллина - Бөрйән районы Әбделмәмбәт ауылы ҡыҙы. Урындағы мәктәпте тамамлағандан һуң, уның алдында ниндәй һөнәр һайларға тигән икеләнеү булмай. Сөнки ул бала саҡтан уҡ үҫкәс медицина юлын һайларға ҡарар итә. Ул ваҡыттарҙы әле лә йылмайып иҫкә ала ул: «Әсәйем уколға барһа, уның менән барып, шәфҡәт туташтарының ауырыуҙарға нисек укол ҡаҙауҙарын, ҡан баҫымдарын үлсәүҙәрен һәм башҡа процедураларҙы ҡыҙыҡһынып күҙәтә инем. Үҫә төшкәс тә, мәктәптән ҡайтышлай, мотлаҡ медицина пунктына инеп ҡайта торғайным», - тине ул хәтирәләре менән уртаҡлашып. Аҡ халатлылар һөнәренә булған һөйөү  уны Белорет медицина училищеһына алып килә. Уны уңышлы тамамлаған дипломлы йәш белгес ең һыҙғанып яратҡан һөнәре буйынса эш башлай.

 Физиотерапия кабинетында эшләүсе ҡыҙҙар көнөнә 60-70 пациентты ҡабул итә. Үҙ эшенең нескәлектәрен яҡшы белгән Лиә Мирхәт ҡыҙы  дауалау курсы ала килгән кешеләргә яҡтылыҡ һәм электр менән дауалауҙың файҙаһын аңлата, уларҙың һорауҙарына ла ентекле, матур итеп яуап бирә.

«Был кабинеттарға врач ҡушыуы буйынса бишенсе көн киләм. Был бүлектә эшләүсе ҡыҙҙар ябай, алсаҡ, мөләйем. Ҙур рәхмәт. Беҙҙең рәхмәт һүҙҙәре үҙҙәренә ҡыуаныс булып ҡайтһын», - ти дауалау курстары үтеүсе Венера Вәхитова.

Эйе, аҡ халатлылар ауырыуҙарҙы медицина яғынан ғына дауалап ҡалмай, ә йылы һүҙҙәре, матур теләктәре менән дә дауалай, тиҙәр. Лиә Мирхәт ҡыҙы тап шундайҙарҙан!

Альбина Байегетова.