Тоҙға ихтыяж арта

“Руссоль” компанияһы шул хаҡта белдерә. Быларҙың барыһы ла пандемияға бәйле икән. Рәсәй Һаулыҡ һаҡлау министрлығы ғәҙәттәге аш тоҙон коронавирус инфекцияһын иҫкәрткән иң ябай ысул, тип белдерҙе. Тоҙ иретмәһен ауырығандан һуң еҫ һиҙеүҙе ҡайтанан тергеҙеү өсөн ҡулланырға кәңәш ителә.

Айырыуса, Ырымбурҙағы Тоҙло Илек ятҡылығында сығарылған тоҙҙоң сифаты яҡшы яҡтан билдәләнә икән. Уның составында бик көслө антиоксидант – селен бар икән. Ғалимдарҙың белдереүенсә, цинк, D витамины һәм селен инфекцияға ҡаршы булған тәьҫире көслө. “Илецксоль” метрология, сертификатлау һәм сифат департаменты етәксеһе Елена Матвееваның белдереүенсә, бер килограмм Илек тоҙонда 17 микрограмм селен тура килә икән. Балыҡ, ит, сәтләүек, ярмалар менән бергә беҙҙең аш тоҙо ла селенды арттырыуға булышлыҡ итә. Шулай уҡ тоҙ иретмәһе менән танау ҡыуышлығын сайҡатыу ҙа йоғошло сирҙәрҙе барлыҡҡа килтергән вируслы һәм бактериаль ҡуҙғытҡыстарҙы кәметә.