Хирургтар ҙа маска тегә

Һуңғы көндәрҙә Баймаҡ үҙәк ҡала дауаханаһы хеҙмәткәрҙәре "Беҙ һеҙҙең өсөн - эштә ҡалабыҙ, ә һеҙ беҙҙең өсөн - өйҙә ҡалығыҙ" девизы аҫтында тәүлек әйләнәһенә эш урындарында ҡалырға мәжбүр.

Бөтә илгә яу булып ябырылған коронавирусты профилактикалау маҡсатында врачтар, шәфҡәт туташтары, ғөмүмән, барлыҡ медицина хеҙмәткәрҙәренең эшен баһалап бөткөһөҙ.

Дауахананың хирургия бүлеге хеҙмәткәрҙәре буш ваҡыттарында күп тапҡыр ҡулланыуға ярашлы медицина маскаһы тегеү менән мәшғүл. Ошо хаҡта хирург Айҙар Ғүмәров үҙенең "Бәйләнештә" социаль селтәрендәге диуарында белдерә. Шуның менән улар берҙәмлектә - көс икәнлеген тағы ла бер тапҡыр дәлилләй.