Милли колоритлы тамаша

Баймаҡ районы башҡорттары ҡоролтайы башҡарма комитеты милләттәштәребеҙгә ул көндә матур саралар ойоштороу тураһында мөрәжәғәт менән сығыш яһаны. Районыбыҙ ауылдарында күркәм ғаиләләр тәбрикләнде, кисәләр үткәрелде. Ә Баймаҡ ҡалаһының ЗаГС бүлегендә яңы башҡорт ғаиләһен тәбрикләү тантанаһы үтте. Иҫке Сибай ауылынан Илдар Уразгилдин менән ниғәмәттән Руфина тайыпова өсөн ул көн ғүмерҙәренең иң иҫтәлекле мәле булғандыр.

Әйтергә кәрәк, сара милли колоритлы, халҡыбыҙҙың күркәм йолаларына таянып үткәрелеүе менән барыһын да хайран итте. Руфина менән Илдар уразгилдиндарҙы Баймаҡ ҡалаһы ҡала биләмәһе хакимиәте башлығы Хәлил Булатов, Баймаҡ районы башҡорттары ҡоролтайы башҡарма комитеты рәйесе урынбаҫары азамат Мөхәмәтшин, райондың “ағинәйҙәр” клубы рәйесе Хөрмә Биктимерова ҡотланы, бүләктәр тапшырҙы. Ағинәйҙәр кәләш иңенә таҫтар япты, кейәү иңенә һөлгө һалды, бал менән май ҡаптырҙы.

– Беҙҙең ғаиләнең тап Башҡорт ғаиләһе көнөндә тыуыуына бик шатбыҙ, – тине йәштәр, – был беҙгә икеләтә яуаплылыҡ өҫтәй. Ғаиләбеҙ ныҡ һәм бәхетле булһын өсөн барыһын да эшләйәсәкбеҙ.