Кисәге һалдаттар - бөгөн ҡартатайҙар

Олатайым матрос булып,

Йыраҡ диңгеҙҙә йөҙгән.

Акула менән киттарҙы

Яҡындан ғына күргән...

Бөрйәнйылға балалар баҡсаһына ҡартатайҙар ҡунаҡҡа килде. Ҡасандыр Совет Ҡораллы көстәрендә хеҙмәт иткән, кителдәрендә ялтырап торған йондоҙҙары менән ғорурланып тыуған яғына ҡайтып төшкән кисәге һалдаттар, бөгөнгө ҡартатайҙар йәшлек мәлдәрен иҫкә алды. Осрашыуға ауылдарының абруйлы ир-егеттәре Нурғәле Солтангәрәев, Рафаэль Вәлишин, Рәшит Тләүсин килде. Уларға яуап итеп, малайҙар йыр-бейеүҙәрен бүләк итте.

Төрлө ерҙә хеҙмәт итеүҙәренә ҡарамаҫтан, улар әрмеләге саҡтарын һағынып һөйләне. Нурғәли Солтангәрәев 3 йыл да 5 ай саперҙар ғәсҡәрендә хеҙмәт итә. Рәшит Тләүсин алыҫ Камчаткала ракета ғәсҡәрҙәрендә хеҙмәт юлын үтә. Рафазль Вәлишин Мәскәү өлкәһендә шофер була. Яҡшы хеҙмәте өсөн төрлө значоктар менән билдәләнәләр. Улар өсөһө лә Бөйөк Ватан һуғышы ветерандарының улдары булыуҙары менән ғорурлана. Хәрби хеҙмәткә саҡырһалар, тағы ла барыр инек, тип белдерҙе улар.