Тылдағы ҡаһарманлыҡ

Тылдағы ҡаһарманлыҡ

Билал китапханаһындағы сираттағы сара тыл ветерандарына һәм һуғыш йылы балаларына арналды һәм ул ошондай исем аҫтында үтте.

Еңеү байрамы – иң оло һәм изге байрам. Ул бөтә халыҡ ғорурлығы, илһөйәрлек, ҡаһарманлыҡ өлгөһө һәм әсе юғалтыуҙар көнө. Шуға ла беҙҙең өсөн унан да ҡәҙерлерәк дата юҡ. Шанлы йылдарҙы иҫкә алып, һуғыш һәм тыл батырҙарына мәдхиә йырлаған 78-се  еңеү байрамы быйыл да билалдар киң билдәләй.

Уҡыусылар, ауылдаштары алдында сығыш яһаусы тыл ветераны Рәйлә инәй Әминева, һуғыш йылы балалары Ирек ағай Зәйнуллин, Мансур ағай Кәримов, Әбүзәр ағай Ғәбдрәшитов, Рәйсә инәй Аманова һәм башҡаларҙың
сығыштары ҡәһәрле һуғыш йылдарына барып тоташа. Билал, Һәмән ауылының ололарын, ветерандар советы рәйесе Зәйнулла Хәсән улы, ҡатын-ҡыҙҙар советы рәйесе, мәғариф ветераны Илдүсә Азат ҡыҙы, ауыл хакимиәте вазифаһын ваҡытлыса башҡарыусы Гөлиә Ансар ҡыҙы ҡотлап изге теләктәрен еткерҙе. Кисә аҙағында барыһын да самауыр сәйе, йылы аш, былау менән һыйлаусы ағинәйҙәр ойошмаһына (етәкселәре М. Әхмәҙина, Ф. Һибәтуллина), ҡатын-ҡыҙҙар советына (етәкселәре И. Әминева, Р. Әминева) ҙур рәхмәтебеҙҙе еткерәбеҙ!

Хөрмәтле ауылдаштар, тыл ветерандары, һеҙҙең барығыҙҙы ла Бөйөк Еңеү байрамы менән бөтә йөрәктән ҡотлайбыҙ, ныҡлы һаулыҡ, яҡшы кәйеф, үҙегеҙгә һәм ғаиләгеҙгә, яҡындарығыҙға аҡ бәхеттәр теләйбеҙ! Еңеү байрамында һеҙҙең исемегеҙ изгелек һәм тыныслыҡ байрағы булып балҡыһын!