Ваҡыт етмәй

«ВАҠЫТ ЕТМӘЙ»

Бар булғаны менән риза булып,

Аллаһ теләгәнсә йәшәргә.

Ваҡыт етмәй ҡайсаҡ йоҡларға ла,

Ҡайнар ашты тәмләп ҡабырға.

Ашығабыҙ… белмәй ҡиблаларҙы,

Ҡай тарафтан ғына табырға?

Ваҡыт етмәй ата-әсәйҙәрҙе

Иҫән саҡта ҡайтып күрергә.

Йәнгә ауыр йөктәр йыйып алып,

Зарланабыҙ яҙмыш - дәүергә.

Ваҡыт етмәй… Тик уфтанмайыҡ әле…

Ҡайғы еле генә иҫмәһен.

Бар нәмәгә ваҡыт етмәгән кеүек,

Китергә лә ваҡыт етмәһен.

Ирек Ғабдрахманов һүҙҙәре һәм көйө.