Район агросәнәғәтенең ғорурлығы

Кооператив үҫемлекселек һәм малсылыҡ тармаҡтарын йылдан-йыл рентабелле үҫтереүгә өлгәшә, алдынғы технологияларҙы файҙалана, перспектив йүнәлештәр өҫтөндә эшләй. Был иһә юғары ҡаҙаныштарға ирешергә мөмкинлек бирә. Район кимәлендәге хеҙмәт ярыштарында ла лениндар бер ҡасан да алдынғылыҡты бирмәй. Кооператив күп тапҡырҙар республика кимәлендә иң һөҙөмтәле эшләгән коллективтарҙың береһе булып танылды һәм БР Хөкүмәтенең дипломдары менән бүләкләнде.
Тәбиғәт ҡуйған һынауҙарға, ҡырағай баҙар шарттарына ҡарамаҫтан, Ленин исемендәге АХК быйыл да төп тармаҡтарҙы ойоштороуҙа рентабелле эшләй. 29 млн 258 мең һум ауыл хужалығы продукцияһы етештерелгән, һөт етештереүҙән 23 млн 56 мең һум, иттән 5 млн 904 мең һум табыш алынған. Килем 4 млн һумдан ашыу тәшкил иткән, производствоның рентабеллеге – 14,3 процент.
Мал һаны һәм продукция етештереү күләме буйынса хужалыҡ төбәктә алдынғылыҡты бирмәй. Әле предприятиела 1350 баш һыйыр малы аҫрала. Йыл башынан тулайым һауым 15917 центнер тәшкил иткән, фураждағы һәр һыйырҙан уртаса 3184 кг һөт һауып алынған. Әйткәндәй, әле көндәлек тулайым һауым 7,5 тонна тәшкил итә, был үткән осорға ҡарағанда күберәк. Малсылыҡ базаларын ҡышҡы миҙгелгә әҙерләү күптән тамамланды – Таулыҡай, Сыңғыҙ һәм Буранбай һөтсөлөк фермаларында хәтһеҙ ремонт эштәре атҡарылды.
Бөгөн хужалыҡта төп көс ныҡлы мал аҙығы базаһы булдырыуға йүнәлтелгән. Әле бында 1056 тонна бесән, 2529 тонна сенаж һалынған. Әйтергә кәрәк, лениндарҙың быйыл да артығы менән тупаҫ һәм һутлы аҙыҡ әҙерләренә шикләнмәҫкә мөмкин. 100 гектарҙағы ужым арышының, бер йыллыҡ үләндәрҙең һәм мал аҙығы культураларының яҡшы уңышы һәм былтырҙан ҡалған запас мал ҡышлатыу миҙгелен уңышлы үткәрергә мөмкинлек бирәсәк.
Быйыл Ленин исемендәге АХК-ның сәсеү майҙандары структураһы 2346 гектарҙы биләп, шуның 1686 гектарын иген, ҡалғанын мал аҙығы культуралары тәшкил итте. Шуныһы һөйөнөслө, бөгөн баҫыуҙарҙа яҡшы уңыш өлгөрә. Был производствоны оҫта ойоштороу, тейешле технологияларҙы аныҡ күҙәтеү, сифатҡа етди иғтибар бүлеү, ер тураһында даими хәстәрлек күреү, коллективтың социаль мәсьәләләрен ваҡытында хәл итеүҙең асыҡ һөҙөмтәһе ул.