Ғәйзулла олатайға - награда

Район хакимиәте башлығы Азамат Иҙрисов  хөрмәтле ветеран Ғәйзулла Мөхәмәт улы Аблюзинға "1941-1945 йылдарҙағы Бөйөк Ватан һуғышында Еңеүгә 80 йыл"юбилей миҙалын тапшырҙы.

Рәсәй Федерацияһы Президенты Владимир Путин тарафынан булдырылған был награда Совет халҡының Бөйөк Ватан һуғышында еңеүенә индергән ҙур өлөшөн таныу символы булып тора. Ун ете йәшендә Ғәйзулла Мөхәмәт улы, иҫ киткес ҡыйыулыҡ һәм тәүәккәллек күрһәтеп, үҙ теләге менән фронтҡа китә. Уның тормошо сыҙамлыҡ һәм батырлыҡ өлгөһө булып тора. Ул күп һанлы ауырлыҡтарҙы еңеп сыға, шул уҡ ваҡытта яҡты киләсәккә һәм оптимизмға ышанысын һаҡлап ҡала. Хатта өлкән йәштә лә ул әүҙем, ҡыҙыҡһыныусан һәм һәр ваҡыт аралашырға әҙер булып ҡала. Әлеге ваҡытта ул Темәс ауылында йәшәй, уны яратҡан кешеләр менән уратып алынған. Был миҙал награда ғына түгел, ә уның батырлығына, бөйөк Еңеүгә баһалап бөткөһөҙ индергән өлөшөнә, бөгөн беҙ йәшәгән донъяға тәрән ихтирам символы.