БАЙРАҒЫБЫҘ
Йәм-йәшел иген баҫыуы,
Муйыл, сейә - шау сәскә.
Зәңгәр күк. Ҡурай тажындай
Ҡояш нурҙарын сәсә.
Йәшел, аҡ һәм зәңгәр төҫтәр -
Нәҡ беҙҙең байраҡ төҫө.
Яҙғы көндәй матур байраҡ -
Яратам шуның өсөн!
(Г.Ситдиҡова)
БАШҠОРТОСТАН ФЛАГЫ
Башҡортостан флагында
Күк, аҡ, йәшел төҫ уйнай.
Зәңгәр күктә талпына ул,
Аҫыл ҡош ҡанатылай.
Күк төҫ – изгелек билдәһе,
Аҡ төҫ – именлек, сафлыҡ.
Йәшел – йәшәү мәңгелеге,
Татыулыҡ һәм азатлыҡ.
Ҡурай сәскәһенең тажы
Дуҫлыҡты һынландыра.
Гел татыу йәшәгән халыҡ
Ерҙә ныҡ баҫып тора.
Республикамдың флагы
Елберләп саңҡығандай:
“Имен, шат, бәхетле булып
Йәшәгеҙ бер туғандай!”
(Ә.Әсәҙуллина)
АНТ ИТӘБЕҘ
Байрағыңдың зәңгәр төҫө –
Яҡты уйҙар сафлығы.
Аҡ төҫөңдә – именлегең,
Йәшел – йәшәү шатлығы.
Байрам итәбеҙ бергәләп,
Башҡортостан, байрамың.
Тоғролоҡҡа ант итәбеҙ,
Ҡулға тотоп байрағың.
(Ә. Әфтәх)
ЯҺАНЫМ МАТУР ФЛАГ
Байрам бөгөн, байрам бөгөн -
Республикамдың көнө.
Флаг яһаным байрамға,
Миңә шундай күңелле!
Флагымда зәңгәр төҫ бар,
Ә уртаһы – ап-аҡтан,
Йәшел төҫ тә балҡып тора -
Өс төҫтө лә яратам.
“Флагыңда изге төҫтәр,” –
Тип ҡыуана атайым,
Ап-аҡ буйҙың уртаһына
Мин ҡурай ҙа яһайым.
Яһайым да мәктәбемә
Тантанаға барамын.
Көтөп алдыҡ
Ватанымдың
Иң-иң бөйөк байрамын!
(Ф.Туғыҙбаева)
+25 °С
Болотло