БАШ ҠАЛА АРТИСТАРЫ БАЙМАҠҠА ЙЫЙЫНА

26 февралдә республикабыҙҙың Мостай Кәрим исемендәге Милли йәштәр театры артистары Баймаҡ Халыҡ ижады үҙәгендә Корней Чуковский әкиәте буйынса ҡуйылған«Айболит һәм Бармалей» мюзиклы менән сығыш яһарға ниәтләй. Ағас төбөндә ултырып, бөтә йәнлектәрҙе дауалаусы доктор тураһындағы әкиәтте яратмаған кеше юҡтыр. Ә ҡурҡыныс Бармалейҙы хәтерләйһегеҙме? Тәүҙә уҫал булып йөрөһә лә, әкиәт аҙағында барыһы менән дуҫлашып ала. Композитор, Башҡортостандың атҡаҙанған сәнғәт эшмәкәре Ильшат Яхин был әкиәткә мюзикл яҙҙы. Ҡуйыусы режиссеры – Башҡортостандың атҡаҙанған сәнғәт эшмәкәре Рөстәм Хәкимов. Был ҡыҙыҡлы әкиәт геройҙары менән осрашыу бер кемде лә битараф ҡалдырмаҫ.