"ЙӘШЕЛ АПТЕКА"ны тулыландырыу ваҡыты етте

Дарыу үләндәре әҙерләү ваҡыты етте. Тик уларҙы юл буйынан, завод тирәһенән ситтә, урман-яландарҙа йыйыу һәйбәтерәк.
Үләндәрҙе ҡыҙыу ҡояш аҫтында киптерергә ярамай, шифаһын юғалтасаҡ. Еләҫ ерҙә яҡшылап киптерелгән үләнде ныҡлап ябылған быяла һауыттарҙа, ҡоро, һалҡынса, ҡараңғы урында һаҡларға кәрәк.
Һары мәтрүшкәне сәскә атҡан осорҙа 15-20 сантиметр оҙонлоғонда йыйырға кәрәк.
Юл япрағын йәй буйына йыйып әҙерләргә лә була. Тик уларҙа таптар булмаһын.
Ромашканы сәскәләре ныҡ асылған саҡта өҙөргә кәрәк. Төнәтмәһен тирләү, тынысланыу өсөн, эсәктәр, ашҡаҙан ауыртҡанда эсәләр. Шулай уҡ яраны сайҡатыу өсөн дә ҡулланалар.
Ҡара ҡарағат, ҡурай еләгенең емештәре лә, япраҡтары ла файҙалы. Тик емештәрен боҙолмаҫ элек киптереү сараһын күреү мотлаҡ.